Center da sandà Val Müstair ha pudü retschaiver il „Strategy Award“
Il Center da sandà Val Müstair es gnü onurà per las grondas fadias i’l provedimaint da la sandà cul premi „Strategy Award“. Üna giuria da 135 persunas da cader sül sectur da sandà svizzer ha surdat il premi a chaschun da l‘occurrenza „Strategy Circle“ da la sandà a Pfäffikon als 11 da marz 2015.
Al „Strategy circle“ s’inscuntran dürant duos dis persunas da cader d’ospidals svizzers ed oters partenaris importants ad üna occurrenza cun discussiuns sur da sfidas e tendenzas i‘l sectur da la sandà. L’occurrenza da quist on ha gnü lö als 10 ed 11 da marz 2015 a Pfäffikon SZ.
Onurada es gnüda duonna Judith Fasser, CEO dal Center da sandà Val Müstair. Ella es gnüda onurada rimplazzond eir las otras instituziuns pitschnas sül sectur da la sandà in Svizra. Tuottas as sfadian permanentamaing cunter la mancanza da persunal qualifichà per pudair spordscher als abitants e turists in regiuns periferas ün bun provedimaint da sandà. Al Center da sandà Val Müstair esa reuschi cun success da realisar i’l rom da la medicina integrada, ün provedimaint cun differents servezzans da sandà suot ün tet.
La buna collavuraziun tanter ils secturs pratcha, ospidal, chasa da chüra, spitex e l’integraziun da sportas supplementaras sco la fisioterapia pussibilteschan als pazchaints üna chüra sainza interrupziun e na cumplichada. Quist es be pussibel grazcha ad üna incletta da qualità unifichada. Implü esa reuschi al Center da sandà da spordscher e mantegner bunas plazzas da lavur in differentas spartas eir sur cunfin. Cul premi „Strategy Award“ vegnan onuradas las fadias dal Center da sandà Val Müstair per üna strategia da sandà orientada vers l’avegnir.
